عمران خان کی پارٹی پی ٹی آئی نے ان کی اس گرفتاری کو اغوا قرار دیا ہے ۔ پی ٹی آئی نے ٹویٹ کرکے کہا کہ پاکستان رینجرس نے پی ٹی آئی کے صدر عمران خان کا اغوا کرلیا ہے ۔ پی ٹی آئی نے یہ بھی دعوی کیا ہے کہ گرفتار کئے جانے کے دوران عمران خان کو پاکستانی رینجرس نے دھکا دیا تھا، جس سے وہ زخمی ہوگئے۔
عمران خان کی گرفتاری کے وقت ہائی کورٹ کے احاطہ میں افراتفری کا عالم نظر آیا، جہاں کئی دیگر لوگوں کو بھی چوٹ آنے کی خبر ہے ۔ پاکستان کے سابق وزیر فواد چودھری نے کہا ہے کہ عدالت پر رینجرس کا قبضہ ہے اور وکیلوں کو اذیت دی جارہی ہے ۔ انہوں نے کہا کہ عمران خان کی کار کو گھیر لیا گیا ہے ۔
پی ٹی آئی کے ایک اور لیڈر اظہر مسوانی نے الزام لگایا کہ رینجرس کے ذریعہ عدالت کے اندر سے 70 سالہ خان کا اغوا کیا گیا ۔ انہوں نے کہا کہ پارٹی نے ملک بھر میں احتجاج کی اپیل کی ہے ۔ وہیں پارٹی کے ایک دیگر لیڈر نے ٹویٹر پر ویڈیو پیغام میں کہا کہ وہ عمران خان کو ٹارچر کررہے ہیں ۔ وہ خان صاحب کو پیٹ رہے ہیں ۔ انہوں نے خان صاحب کے ساتھ کچھ کیا ہے ۔